Ekki á morgun heldur hinn.

Íslandsferðin alveg að bresta á :) gaman gaman.
Allt að verða klárt. Búið að pakka ofaní tösku (já bara eina takk fyrir. Hlýtur að vera met) eða svona að mestu. Snyrtidótið fer nú ekki ofaní fyrr en annaðkvöld. Ég er líka búin að taka risloftið og miðhæðina í gegn og er byrjuð á jarðhæðinni. Ætla ekki að koma heim á páskadag og hafa allt í skít og drasli. Það var frí í skólanum hjá mér í dag en ég fékk samt Jolöndu hingað til mín (sem passar Emmu ) til að taka stelpurnar með sér út í rúma 2 tíma. Ég gat gert mjög mikið á þeim tíma. Ótrúlegur munur að hafa smá frið þegar maður er að reyna að flýta sér.

Ég fór í fyrsta munnlega prófið mitt á mánudaginn. Það var nú frekar fyndið. Ég er nú ekki sú sleipasta í Hollenskunni :) Lang lélegust í því að tala þarna í skólanum, enda ekki búin að vera jafn lengi og hinir. Kennarinn sagði við mig að ég gæti bara ráðið því hvort ég tæki þetta próf eða ekki. Það myndi ekki liggja á því þar sem ég á eftir að vera svo lengi í skólanum, en spurði svo hvort ég væri ekki bara til í að prófa.
Ég er farin að skilja mjög mikið talað mál, skil t.d nánast allt sem kennararnir eru að tala um, sem og nágranarnir og aðrir sem maður er að spjalla við. Mér finnst erfiðara að skilja fréttir í útvarpi og þætti í sjónvarpi. Yfirleitt veit alveg um hvað fréttirnar eru en ég næ bara ekki að halda einbeitingunni :( frekar pirrandi.

Malín er ótrúlegur snilli. Hún talar Hollensku reiprennandi og er með hreiminn alveg á tæru :)
Leikskólakennararnir eru allir svaka ánægðir með hana. Finnst hún alls ekkert tala minna en hinir krakkarnir. Ég held að hún sé ekkert verri í Hollensku en Íslensku. Það er eitt alveg ferlegt með hana. Við Ægir höfum verið að taka eftir því að hún er farin að tala Íslensku eins og hún sé að tala Hollensku. Hún raðar stundum orðunum þannig upp eins og þetta sé Hollensk setning. Hollendingarnir raða nefnilega orðunum í allt aðra röð en við gerum. En það er nú samt ansi mikið fyndið að hlusta á hana þegar hún talar svona.
Hún talar alltaf Íslensku við okkur Ægi en þegar hún talar við Emmu svissar hún oft yfir í Hollensku og eins talar hún mjög mikla Hollensku þegar hún er að leika sér en það er nú kannski bara skiljanlegt þar sem hún leikur sér alltaf við Hollenska krakka.

Emma varð 5 mánaða í gær. Bolla litla er voða þæg og góð eða svona næstum alltaf :). Það gengur voða vel að hafa hana í pössun, alveg sama hvort það sé hjá Jolanda, Marielle nágranakonu minni eða í sportinu. Henni er alveg sama :)
Þessi elska er nú samt alveg að gera út af við mömmu sína. Ég hef aldrei verið jafn þreytt og pirruð. Mér finnst bara eins og ég geti sofið í heila viku. Úfff hvað það verður gott þegar hún hættir að súpa á nóttunni og fer í sitt eigið herbergi. Ég er bara alveg að gefast upp á þessu. Hún vaknar 2-3 x yfir nóttina til að fá sér að drekka og ég vaki á meðan og bíð eftir að hún sé búin, legg hana svo í sitt rúm og oftar en ekki er ég hundlengi að sofna sjálf aftur.

Það verður ótrúlega gott að komast heim (til Íslands) í smá frí. Ég hef kannski tök á því að fá mér svona eins og eina-tvær kríur ef einhver nennir að passa snúllurnar mínar.


Sjáumst á Íslandi :)